Hany fæddist í Vín í Austurríki. Hann hlaut menntun sína sem ballettdansari frá Nel Roos Academie í Amsterdam og var dansari hjá Íslenska dansflokknum á árunum 1988-1995. Hany lærði grafíska hönnun við Listaháskóla Íslands og starfaði á ýmsum auglýsingastofum i kjölfarið, auk þess að reka sína eigin hönnunarstofu. 

Dans er mikilvægur þáttur í lífi Hany og eftir að hann lauk ballettferli sínum hófst ferill hans sem kennari og dansari í argentínskum tangó, samhliða starfinu sem grafískur hönnuður. Hann og Bryndís Halldórsdóttir, dansfélagi hans og eiginkona, voru frumkvöðlar í tangósenunni á Íslandi og stofnuðu m.a. Reykjavik Tango Club. Þau hófu síðar störf hjá M2tango Studio í Kaupmannahöfn þar sem þau kenndu og dönsuðu í 12 ár, ásamt því að sinna kennslu- og sýningarhaldi víðs vegar um Norðurlönd. Hany gerðist loks meðeigandi og markaðsstjóri M2tango Studio og lauk diplomanámi í stafrænni markaðssetningu frá Bigum & co. Kaupmannahöfn.

Í dag býr Hany í Reykjavík. Hann hóf störf sem markaðsstjóri Íd í desember 2023.