Valgerður Rúnarsdóttir man ekki eftir sér öðruvísi en dansandi og hefur trú á að dansinn geti gert kraftaverk. Hún hefur starfað sem dans­höfundur og dansari hér­lendis og erlendis frá árinu 1998,  eða allt frá því að hún útskrifaðist með BA gráðu í sam­tíma­dansi frá Lista­há­skólanum í Osló. Auk þess lauk hún meistara­námi í sviðs­listum við Lista­háskóla Íslands 2022 og meistara­námi í verkefna­stjórnun (MPM) við Há­skólann í Reykjavík 2023. 

Val­gerður hóf snemma á dansferlinum að semja eigin verk og fann sér leiðir til að vinna og sína verk sín víða um borg. Hún hefur unnið í samsköpun með öðrum listamönnum, með áhugafólki á öllum aldri, allt frá börnum til eldri borgara. Hún hefur oft notast við óhefðbundin rými og hefur þannig m.a. unnið verk í listasöfnum, yfirgefnum húsum, í fiskvinnslum, breytt Reykjavík og bæjum úti á landi í dansandi sögusvið. Einnig hefur hún unnið í hefðbundnum leikhúsrýmum og hefur m.a. samið verk fyrir Reykjavík dans festival, Íslenska dansflokkinn, leiksýningar, kvikmyndir og auglýsingar. Hún hefur leitt fjölda verk­efna og hlotið viðurkenningar, m.a. fjölmargar tilnefningar til Grímunnar auk þess að hljóta tvisvar Grímu­verðlaunin sem dans­höfundur ársins. 

Um árabil var Valgerður fastráðinn dansari hjá Íslenska dans­flokknum eða þar til henni bauðst starf með einum fremsta dans­höfundi samtímans, Sidi Larbi Cherkaoui frá Belgíu og dansflokki hans Eastman. Hún tók þátt í að skapa og sýna verk dans­höfundarins víða um heim í rúm 10 ár auk þess að starfað með Damien Jalet og Ernu Ómarsdóttur í verkum þeirra  sem einngi hafa verið sýnd heimshorna á milli. Valgerður hefur tekið þátt í upp­færslum Leikfélags Reykjavíkur, Þjóð­leikhússins auk fjölda annarra sjálf­stæðra verkefna hér­lendis og er­lendis sem dansari.

Þá hefur Valgerður einnig fengist við kennslu samhliða listsköpun sinni. Hún hefur kennt í Listaháskólum, listdansskólum og hefur einnig leitt vinnustofur í grunnskólum víða um land og gefið fleiri þúsund börnum innsýn inn í heim dasnlistarinnar.

Valgerður hefur tekið virkan þátt í kjara­baráttu og upp­byggingu dans­senunnar á Íslandi. Setið í stjórn Dans­verkstæðisins, Reykjavík Dance Festival, Félagi íslenskra listdansara og Félagi íslenskra leikara.