DAGDRAUMAR | [ Íd ] Íslenski dansflokkurinn

Dagdraumar


Ung stúlka leggur land undir fót og ferðast um undur veraldar, um skóg og yfir sjó, finnur dýr og ævintýr. Dýrin eru undursamleg og töfrandi. Slangan snýst og sniglast og svanurinn virðist þekja himininn með vænghaf sitt. Bara ef stúlkan gæti búið yfir slíkum kyngikrafti, liðug, snörp og létt á tá, svífandi um loftin blá. Skyndilega rennur upp töfrastund og draumar hennar rætast, stúlkan tekur á sig nýja mynd. Hún umbreytist á einhvern magnaðan hátt. En hún sá ekki fyrir hvað það myndi kosta hana, hvað það kostar að njóta eiginleika dýranna. Þegar ferðalagi stúlkunnar lýkur og hún snýr aftur heim bíður móðir hennar í gættinni. Hún opnar faðminn en hikar, því hún þekkir ekki dóttur sína aftur, hún hefur breyst svo mikið. Stúlkan áttar sig á því hversu dýrmætt er að vera eins og maður er. Hún sleppir snarlega takinu af nýju eiginleikunum sínum og velur að vera hún sjálf. Það er líka sérstakt því það er enginn annar sem getur það. Það er undursamlegt og töfrandi, vel geymt leyndarmál sem deila má með smárri sál.

Dagdraumar er annað verk tvíeykisins Ingu Marenar og Júlíönnu Láru. Samstarf þeirra má rekja aftur til ársins 2007 þegar þær stofnuðu Menningarfélagið ásamt Ásgeiri Helga Magnússyni og Lydíu Grétarsdóttur. Menningarfélagið framleiddi fimm sviðsverk og þrjár dansstuttmyndir í samstarfi við Þóru Hilmarsdóttur. Árið 2020 frumsýndu þær saman verkið ÆVI og um þessar mundir vinna þær einnig að dansverkinu Þoka sem verður frumsýnt veturinn 2021 – 2022.  Báðar sýningarnar eru unnar í samstarfi við Íslenska dansflokkinn og hafa hlotið styrk frá leiklistarráði og listamannalaunum.


Inga Maren hefur unnið hjá Íslenska dansflokknum frá árinu 2011. Jafnframt hefur hún starfað í verkefnum erlendis og með sjálfstæðum hópum hér á landi. Inga Maren lauk BA prófi við London Contemporary Dance School, er með kennsluréttindi í Flying Low og Passing Through tækni frá David Zambrano og er menntaður Yogakennari.

Júlíanna hefur unnið með Íslenska dansflokknum frá árinu 2012 sem búninga- og sviðsmyndahöfundur. Júlíanna lauk BA prófi við Central Saint Martins listaháskólann í London árið 2010 og hefur starfað sem búninga- og leikmyndahönnuður fyrir kvikmyndir, þætti, stuttmyndir, tónlistarmyndbönd, auglýsingar og leikhús.


Dansverk fyrir börn frá tveggja ára aldri.

Verkið er 40 mínútur. Að því loknu verða kenndar danshreyfingar fyrir þá sem vilja.


Hugmynd og danshöfundur: Inga Maren Rúnarsdóttir

Sviðsmynd og búningar: Júlíanna Lára Steingrímsdóttir

Dansarar;

Stúlka: Charmene Pang

Móðir & svanur: Halla Þórðardóttir

Slanga, héri og könguló: Ásgeir Helgi Magnússon

Myndahöfundur; sýningarskrá, sviðsmynd og veggspjald: Auður Þórhallsdóttir

Búningagerð: Alexía Rós Gylfadóttir

Lýsing: Pálmi Jónsson

Tónlist: Lög eftir Alexandre Desplat, Henry Mancini, Jonny Greenwood, Dario Marianelli, Danny Elfman og Portico Quartet.

Hjóð: Baldvin Þór Magnússon

Ljósmyndir: Saga Sigurðardóttir

Hreyfingarnar í verkinu voru unnar í samstarfi við dansarana og Þyri Huld Árnadóttur sem einnig aðstoðaði við búningagerð.


Frumsýnt 15. maí 2021 á Nýja sviði Borgarleikhússins.


Vinafélag Íd

Vilt þú taka þátt í því að styðja við bakið á framþróun íslenskrar dansmenningar?

Íslenski dansflokkurinn hefur sett á legg vinafélag fyrir alla þá sem  láta sig starfsemi dansflokksins varða.
Félagið mun standa fyrir opnum æfingum, kynningum á verkum, umræðum eftir sýningar og árlegum kynningarkokteil.
Allir geta orðið meðlimir í Vinafélaginu og hægt er að skrá sig með því að senda póst á vinafelag@id.is.

Árgjald Vinafélagsins er 3.500 kr.

sadsad