GEIGENGEIST | [ Íd ] Íslenski dansflokkurinn

Geigengeist


Geigengeist er nýtt verk eftir teknófiðludúóið Geigen. Verkið er unnið í samstarfi við Íslenska dansflokkinn, Tönju Huld Levý búningahönnuð og Sean Patrick O’Brien listamann.

Á fjarlægum stað mætumst við á einu andartaki í gegnum samhljóm fiðlunnar. Í þessari fiðlulaga vídd víbrar andrúmsloftið og umhverfið umbreytist stöðugt við taktfastan hjartslátt teknótónlistarinnar. Lífverurnar hér eru samtengdar þeim öflum sem eru að verki og hrífa gesti með í heim líkamlegrar tjáningar.

Geigengeist er upplifunarveisla, þar sem dans, tónlist, hönnun og myndlist koma saman undir formerkjum dansklúbbsins. Klúbburinn er geimræn fiðluveröld sem áhorfandinn gengur inn í, ferðast um og tekur þátt í. Hér mætist fortíð, framtíð og nútíð í veldislausu og frjálsu rými sem táknmynd sameiningar og samstöðu sem og einstaklingsfrelsis. Þannig er verkið tillaga að framtíðar-samfélagsanda.

Teknófiðludúóið Geigen samanstendur af tónskáldinu Pétri Eggertssyni og danshöfundinum og listakonunni Gígju Jónsdóttur. Þau stofnuðu Geigen í San Francisco haustið 2018 og hafa síðan í ársbyrjun 2019 staðið fyrir tónleikaupplifunum Geigen Galaxies sem hafa m.a. verið sýndar á Reykjavík Dance Festival/Vorblótinu, á listahátíðinni LungA á Seyðisfirði, nýmiðlahátíðinni Raflost og barnatónlistarhátíðinni Big Bang. Geigen er uppreisn gegn hinni klassísku birtingarmynd fiðlunnar, þráin til að þess að brjótast út úr hefðbundnum strúktúr, upphafning fiðlunnar og tilraun til þess að færa hana inn í framtíðina og nota hana sem sameiningarafl þvert á listgreinar.

Verkið er styrkt af Sviðslistarráði og var valið samstarfsverkefni Íslenska dansflokksins veturinn 2022 – 2023.


Frumsýning 11. nóvember 2022 á Litla sviði Borgarleikhússins.


Vinafélag Íd

Vilt þú taka þátt í því að styðja við bakið á framþróun íslenskrar dansmenningar?

Íslenski dansflokkurinn hefur sett á legg vinafélag fyrir alla þá sem  láta sig starfsemi dansflokksins varða.
Félagið mun standa fyrir opnum æfingum, kynningum á verkum, umræðum eftir sýningar og árlegum kynningarkokteil.
Allir geta orðið meðlimir í Vinafélaginu og hægt er að skrá sig með því að senda póst á vinafelag@id.is.

Árgjald Vinafélagsins er 3.500 kr.

sadsad