Athugið:
Í sýningunni blikka ljós mjög reglulega í gegnum allt verkið, og hljóð ferðast um allt rýmið, umhverfis áhorfendur. Áhorfendur sitja í návígi við flytjendur. Vinsamlegast hafið þetta í huga ef þið eruð viðkvæm fyrir sterku ljósi eða hljóði. Einnig fyllir lykt frá Fischersund rýmið, ilmur sem ber með sér keim af hafinu.

Aðalheiður Halldórsdóttir

Aðalheiður Halldórsdóttir stundaði dansnám við Listdansskóla Íslands, Tanz Akademie Köln, Þýskalandi, danshöfundanám við ArtEz University of the Arts, Arnhem, Hollandi og síðar nám í Bókmenntafræði og Ritlist við Háskóla Íslands.

Aðalheiður var fastráðinn dansari við Íslenska Dansflokkinn í um 16 ára skeið og sem slíkur, var hún hluti af sköpunarferli um 50 smárra og stórra sviðsverka innan veggja Borgarleikhússins sem mörg hver túruðu um heiminn. Hún hefur jafnframt dansað, sungið og leikið í uppfærslum Íslensku Óperunnar, Leikfélags Reykjavíkur og ótal verkum innan sjálfstæðu danssenunnar.

Sem höfundur hefur Aðalheiður samið verk fyrir Íslenska dansflokkinn, Reykjavík Dance Festival og  Ég býð mig fram, séð um sviðshreyfingar í leiksýningum Borgarleikhússins, unnið að gerð tónlistarmyndbanda og stuttmynda og sviðsett viðburði innan tónlistarvettvangsins þá helst með tónlistarkonunni Bríeti. Hún hefur auk þessa gegnt stöðu aðstoðarleikstjóra og leikstjóra.

Aðalheiður hefur verið hluti af listrænum kollektívum á við: Vaðall ásamt Valgerði Rúnarsdóttur og Darra Lorenzen, listamannkórnum Kliði, Die to meet you ásamt Kristínu Önnu Valtýsdóttur og síðustu ár stigið inn í performatíva viðburði Anne Carsson og Robert Currie bæði hérlendis og erlendis. Hún hefur samhliða þessu sinnt ritstörfum og m.a. gefið út ljóðabókina  Taugatrjágróður hjá útgáfu Bjarts & Veraldar.

Aðalheiður hefur hlotið fjölda Grímutilnefninga og verðlauna fyrir störf sín sem dansari, leikkona, danshöfundur og höfundur sviðshreyfinga í leikverki.